Eń jaqsı kurslarımız
Histudy is a education website template. You can customize all.
FAQ
Qısqa soraw-juwaplar
Virtual akademiya, oqıw kursları, sertifikatlar hám oqıw tártibi boyınsha kóp beriletuǵın sorawlarǵa juwaplar.
Hesh nárse tabılmadı. Basqa sóz benen izlep kóriń yáki biz benen baylanısıń.
«Korrupciyaǵa qarsı gúres virtual akademiyası» elektron platformasi — bul xalıq hám mámleket xızmetkerleriniń korrupciyaǵa qarsı gúres tarawındaǵı bilimlerin úzliksiz arttırıwǵa qaratılǵan elektron oqıw platformasi.
«Korrupciyaǵa qarsı gúres virtual akademiyası» elektron platformasi Ózbekistan Respublikası Prezidentiniń 2024-jıl 21-iyundaǵı «Xalıq hám mámleket xızmetkerleriniń korrupciyaǵa qarsı gúres tarawındaǵı bilimlerin úzliksiz arttırıw sistemasın engiziw ilájları haqqında»ǵı PQ-228-sanlı qararı menen engizilgen. Sonday-aq, Ózbekistan Respublikası Korrupciyaǵa qarsı gúres agentligi hám Bas prokuraturanıń «Korrupciyaǵa qarsı gúres virtual akademiyası» elektron platformasında oqıtıwdı shólkemlestiriw tártibi haqqındaǵı rejeni tastıyıqlaw haqqında»ǵı qararı [Ádliye ministrligi tárepinen 2024-jıl 30-oktyabrde dizimnen ótkerildi, dizim nomeri 3565] menen mámleket xızmetkerleri hám xalıqtıń Virtual akademiyada oqıtıwdı shólkemlestiriw tártibi tastıyıqlanǵan.
Virtual akademiyada oqıw jumısın shólkemlestiriw hám júrgiziw Korrupciyaǵa qarsı gúres agentligi hám Huqıqtı qorǵaw akademiyası tárepinen ámelge asırıladı.
Virtual akademiyada oqıtıw korrupciyaǵa qarsı gúres tarawında bazislıq hám arnawlı oqıw kursları boyınsha jolǵa qoyıladı.
Arnawlı kurslarǵa kiriw ushın mámleket xızmetkerleri shártnamada kórsetilgen oqıtıw qıymatı buyırtpashı shólkem tárepinen tolıq tólengennen keyin, bilim alıwshılar tárepinen birden-bir identifikaciya sistemasi (One ID) járdeminde dizimnen ótiw arqalı Virtual akademiyanıń arnawlı oqıw kurslarında oqıw imkaniyatı shólkemlestiriledi. Sonday-aq, mámleket xızmetkerlerine sistemaǵa kiriw ushın Akademiya tárepinen tayarlap berilgen arnawlı parol hám loginler járdeminde kiriw múmkin.
Mámleket xızmetkerleri ushın shólkemlestiriletuǵın arnawlı oqıw kursları kásiplik ádep-ikramlılıq qaǵıydalarına ámel qılıw, mápler qarama-qarsılıǵın joq etiw hám korrupciyaǵa qarsı gúrestiń tiykarǵı baǵdarları boyınsha ǵárezsiz ózlestiriw arqalı ámelge asırıladı. Shınıǵıwlar grafiginde asinxron rejimdegi shınıǵıwlar hám aralıq baqlaw jumısın orınlaw kúnine 2 saattan rejelestiriledi. Asinxron shınıǵıwlarda bilim alıwshılar Virtual akademiyaǵa jaylastırılǵan tiykarǵı hám qosımsha elektron oqıw materialların ǵárezsiz túrde ózlestiredi hám temalar boyınsha alǵan bilimlerin tekseriw ushın baqlaw jumısların orınlaydı.
Virtual akademiyanıń arnawlı oqıw kurslarında korrupciyaǵa qarsı gúres tarawında qániygelikti arttırıw mámleket xızmetkerleri ushın minnetli, basqa kontingent ushın ıqtıyarlı esaplanadı. Mámleket xızmetkerleri esaplanbaytuǵın shaxslardı arnawlı oqıw kurslarında oqıtıw ıqtıyarlılıq tiykarında ámelge asırıladı.
Teńlestirilgen oqıw programmaları tiykarındaǵı arnawlı kurslar korrupciyaǵa qarsı ishki baqlaw dúzilmeleri hám korrupciyalıq qáwip-qáterleri joqarı bolǵan mámleket xızmeti lawazımlarında xızmet etiwshi xızmetkerler ushın alıp barıladı.
Virtual akademiyada oqıwı kerek bolǵan mámleket xızmetkerlerine mámleket organları hám shólkemlerinde óz xızmetin miynet shártnaması (kontrakt) tiykarında yamasa saylanatuǵın yaki tayınlanatuǵın lawazımlarda ámelge asırıp atırǵan basqarıw xızmetkerleri kiredi.
Virtual akademiyada tyutor (oqıtıwshı-konsultant) jumısı Akademiya professor-oqıtıwshıları hám xızmetkerleri tárepinen ámelge asırıladı. Mámleket organları hám shólkemleriniń qániygeleri de tyutor (oqıtıwshı-konsultant) jumısın ámelge asırıwı múmkin. Tyutor — bul bazislıq hám arnawlı oqıw kurslarında tiyisli oqıw modulı boyınsha bilim alıwshılar jumısın muwapıqlastırıwshı hám baǵdarlawshı, metodikalıq járdem kórsetiwshi, oqıw-metodikalıq materiallardı islep shıǵıw funkciyaların ámelge asırıwshı juwapker xızmetker.
Mámleket xızmetkeri jumısqa qabıl etilgennen keyin úsh ay ishinde oqıw kursınan ótedi. Mámleket xızmetkeri qániygelikti arttırıw formasında oqıǵanda oqıw dáwirligi hár úsh jılda keminde bir mártebeni quraydı.
Virtual akademiyada oqıw procesiniń sapalı shólkemlestiriliwin monitoring etip barıw Korrupciyaǵa qarsı gúres agentligi tárepinen ámelge asırıladı. Sonday-aq, Akademiyanıń arnawlı tarmaqları ishki monitoringti ámelge asırıp baradı.
Arnawlı oqıw kurslarında kiris, aǵımdaǵı, aralıq hám juwmaqlawshı baqlaw túrleri ótkeriledi. Bunda, aǵımdaǵı, aralıq hám juwmaqlawshı baqlaw túrlerinde bilim alıwshılardıń bilimlerin baholaw túrli interaktiv sınaqlar, máseleli jaǵdaylar hám basqa tapsırmalar hám test formasında ámelge asırıladı. Kiris baqlaw túrinen onıń nátijelerin juwmaqlawshı baqlaw túri nátijeleri menen salıstırıw maqsetinde paydalanıladı hám baqlaw túrlerin ulıwma esaplawda esapqa alınmaydı.
Xalıq hám mámleket xızmetkerlerinıń korrupciyaǵa qarsı gúres tarawındaǵı bilimlerin úzliksiz arttırıw sistemasınıń tiykarǵı maqsetleri tómendegilerden ibarat: - xalıq hám mámleket xızmetkerlerinıń huqıqıy sanası hám huqıqıy mádeniyatın joqarılatıw; - jámiyette korrupciyaǵa qarata huqıqıy immunitetti qáliplestiriw; - jas áwladtıń sanasına halallıq qádiriyatların sińdiriw; - korrupciyaǵa qarsı gúreske juwapker hám korrupciyalıq qáwip-qáterleri joqarı bolǵan mámleket xızmeti lawazımlarındaǵı xızmetkerlerdiń bilimi, uqıbı hám qániygeligin turaqlı túrde arttırıp barıw; - mámleket xızmetkerlerinıń korrupciyaǵa qarsı gúres tarawındaǵı bilimlerin baholaw.
Virtual akademiyada korrupciyaǵa qarsı gúres boyınsha oqıw programmaları tómendegi kontingent ushın arnalǵan: - xalıq; - iskerlik subektleri wákilleri; - mámleketlik bolmaǵan kommerciyalıq bolmaǵan shólkemler hám basqa puqaralıq jámiyeti institutları wákilleri; - bilimlendiriw shólkemleri tárbiyalanıwshıları, oqıwshıları hám studentleri; - mámleket organları hám shólkemleriniń mámleket xızmetkerleri; - mámleket qatnasıwındaǵı kárxanalardıń xızmetkerleri.
Bazislıq oqıw kursları — bul Virtual akademiyada jaylastırılatuǵın hám paydalanıw ushın barlıq bilim alıwshılarǵa ashıq bolǵan korrupciyaǵa qarsı gúres hám onıń aldın alıw boyınsha shólkemlestiriletuǵın oqıw kursları. Bazislıq oqıw kursları barlıq bilim alıwshılar ushın bıypul hám olardan qálegen waqıtta hám sheklenbegen muǵdarda paydalanıw múmkin. Bazislıq oqıw kursları jumıstan ajıralmaǵan halda, asinxron rejimde qashıqtan turıp elektron bilimlendiriw resurslarını ǵárezsiz túrde ózlestiriw tiykarında ámelge asırıladı. Bunda bilim alıwshılarǵa korrupciya túsinigi, tariyxı, aqıbetleri, oǵan qarsı gúres hám aldın alıwǵa tiyisli máselelerdi túsindiriw arqalı olardıń huqıqıy sanası hám mádeniyatın joqarılatıw, jámiyette korrupciyaǵa qarata huqıqıy immunitetti qáliplestiriwge qaratılǵan formada shólkemlestiriledi. Bazislıq oqıw kursları birneshe minutta ózlestiriw múmkin bolǵan jańalıqlar, máseleli jaǵdaylar hám olardıń sheshimleri, soraw-juwap hám túrli sınaqlar ótkeriw arqalı ámelge asırıladı. Bazislıq oqıw kurslarınan qálegen waqıtta hám sheklenbegen muǵdarda paydalanıw múmkin.
Mámleket xızmetkerlerine arnawlı oqıw kurslarında korrupciyaǵa qarsı gúres tarawında oqıtıw tómendegi minnetli kurslar tiykarında alıp barıladı: jumısqa qabıl etilgennen keyin úsh ay ishinde 36 saattan kem bolmaǵan arnawlı oqıw kursı; hár úsh jılda keminde bir mártebe qániygeligi arttırılǵanda 12 saattan kem hám 24 saattan kóp bolmaǵan arnawlı oqıw kursı. Korrupciyaǵa qarsı ishki baqlaw dúzilmeleri xızmetkerleri ushın shólkemlestiriletuǵın arnawlı oqıw kursları 24 saattan kem hám 36 saattan kóp bolmaǵan oqıw kursı sıpatında shólkemlestiriledi. Korrupciyalıq qáwip-qáterleri joqarı bolǵan mámleket xızmeti lawazımlarında xızmet etiwshi xızmetkerler ushın arnawlı oqıw kursları 12 saattan kem hám 24 saattan kóp bolmaǵan oqıw kursı sıpatında shólkemlestiriledi.
Prezidenttiń 21.06.2024 jıldaǵı PQ-228-sanlı qararınıń 5-bántine muwapıq, Virtual akademiyada bazislıq oqıw kurslarında oqıtıw barlıq paydalanıwshılar ushın bıypul tiykarda shólkemlestiriledi, arnawlı oqıw kurslarında qániygelikti arttırıw tólem-shártnama tiykarında ámelge asırıladı. Mámleket xızmetkerleri toparına kirmeytuǵın shaxslar arnawlı kurslarda dizimnen ótiw ushın Virtual akademiyanıń rásmiy veb-saytına kirip, oqıw ushın arza tapsırıwı múmkin.
Arnawlı oqıw kurslarında tólem-shártnama tiykarında qániygelikti arttırıw ushın tólem muǵdarı Akademiyanıń Ǵamqorlıq keńesi tárepinen Agentlik hám Ekonomika hám finans ministrligi menen kelisilgen halda tastıyıqlanadı. Tastıyıqlanǵan muǵdar Virtual akademiya saytında jaylastırıladı. Tólemli programmalardıń bahası olardıń dawamlılıǵı (saatı) hám mazmunına baylanıslı halda belgilenedi.
Mámleket xızmetkerlerinıń qániygeligin arttırıw menen baylanıslı qarejetler tiyisli mámleket organı yamasa shólkemine usı maqsetler ushın názerde tutılǵan budjet qarejetleri sheginde yamasa olardıń budjetten tısqarı qarejetleri, sonday-aq, nızamshılıqta qadaǵanlanmaǵan basqa deregler esabınan qaplanadı.
Virtual akademiyada arnawlı oqıw kursların nátiyjeli juwmaqlaǵan shaxslarǵa Agentlik hám Akademiya tárepinen tastıyıqlanatuǵın úlgidegi ámel etiw múddeti úsh jıl bolǵan sertifikat beriledi
Oqıw kurslarında aǵımdaǵı, aralıq hám juwmaqlawshı baqlaw nátijelerinen narazı bolǵan bilim alıwshılar usı imtixanlar nátijeleri járiyalanǵan kúnnen baslap jeti jumıs kúni ishinde Akademiyanıń Apellyaciya komissiyasına jazba yamasa elektron formada apellyaciya arzası beriwi múmkin.
Arnawlı oqıw kurslarında aǵımdaǵı, aralıq hám juwmaqlawshı baqlaw túrlerin ózgeli sebepler boyınsha (kesellik, jaqın tuwısqanlarınıń ólimi, miynet tárepi, Ózbekistan Respublikasınan tısqarıda bolıwı sebepli) tapsıra almaǵan bilim alıwshıǵa olardıń nátijeleri járiyalanǵan kúnnen baslap bir ay ishinde qayta tapsırıw ushın imkaniyat beriledi. Bunda, bilim alıwshıdan aǵımdaǵı, aralıq hám juwmaqlawshı baqlaw túrlerin qayta tapsırıw tólem-shártnamanı qayta rásmiylestirmegen halda ámelge asırıladı. Aǵımdaǵı, aralıq hám juwmaqlawshı baqlaw túrlerin tapsıra almaǵan bilim alıwshı arnawlı oqıw kursın bıypul tiykarda qayta oqıw huqıqına iye. Bul jaǵday ózgeli sebepleri bolmaǵan tıńlawshılarǵa qarata qollanılmaydı.
Sorawıńızǵa juwap tappadıńız ba?
Biz benen baylanısıń — qániygelerimiz járdem beredi.